નવા વરસે કંઇક નવું કરજો

| મુંબઈ સમાચાર | વરાઇટી સપ્લીમેન્ટ | લાતની લાત ને વાતની વાત | ૩૦-૧૦-૨૦૧૧| અધીર અમદાવાદી |

નવા ઉત્સાહ અને નવા ઉમંગ લઈને નવું વરસ આવી ગયું છે. પણ આ નવા વરસમાં તમે એ જ જૂનાં સગાઓને ઘેર જઈ એજ જૂનાં મઠીયા અને ઘૂઘરા ખાઈ, એ મઠીયા અને ઘૂઘરા કોણે બનાવ્યા એની એજ વાતો સાંભળી, એજ જૂની પત્ની સાથે એજ જૂનાં ઘરે પાછાં પાર્ક થઇ ગયા હશો. અને હવે આવતીકાલથી જૂની પત્નીના હાથની ચા પી, લંચ બોક્સમાં એજ ભાખરા ભરી, એજ જૂની નોકરીમાં એજ જૂનાં ખડ્ડુસ બોસ અને કચકચિયા સહકર્મચારીઓ સાથે નવા વરસની ઘરેડમાં લાગી જશો. ભલા માણસ, એ તો વિચારો કે ગયા વરસે પણ નવું વરસ બેઠું હતું પણ આખા વરસમાં તમે કશું નવું કર્યું ખરું?

નથી કર્યું ? શું તમે પણ! હવે બદલી કાઢો. પત્ની સિવાય બીજું બધું જ બદલી કાઢો. પત્ની બદલવાની સલાહ એટલા માટે નથી આપતો કારણ કે જો આમ બદલી કાઢવાની ચોઈસ તમારી પત્ની પાસે હોત તો એણે તમને જ ક્યારના બદલી કાઢ્યા હોત! માટે જેમ એ તમને સુખેદુખે નભાવે છે એમ તમે પણ એને નભાવી લો.

તો નોકરી બદલી કાઢો. એકદમ ફાલતું કંપની છે. તમારા જેટલા જ ક્વોલિફાઈડ દોસ્તો કરતાં તમને વીસ ટકા ઓછો પગાર મળે છે. અને ઓફિસમાં તમને બેસવાની જગ્યા પણ કેવી સાંકડી આપી છે. ચારે તરફ ફાઈલોના ઢગલા વચ્ચે તમે ઉકરડામાં ભુંડ બેઠું હોય તેમ બેઠેલા હોવ છો. અને ઓફિસમાં પટાવાળો પણ ત્રણ વાર બેલ મારો ત્યારે એક વખત આવે છે. બહારગામ ઉઘરાણીનું કામ હોય તો બોસ તમને જ મોકલે છે. અને તમારો ખડ્ડુસ બોસ. એને તો ગોળીએ દેવા જેવો છે નહિ? તમે એક લેટર ટાઈપ કરો એમાં પચાસ ભૂલો કાઢે. એમાં પાછી ‘આ તેંતાલીસ ભૂલો તો દર વખતે થાય છે’ એમ કહી તમને એ ધમકાવે છે. તમે મોડા આવો એ દિવસે તમે ખુરશીમાં સેટ થાવ એ પહેલા એ તમને રિમાંડ ઉપર લે છે અને ને તમે જે દિવસે વહેલા જવા માંગતા હોવ એ દિવસે તમને ઓવર ટાઈમ કરવા કહે છે.

હા એ અલગ વાત છે કે તમને બે વાર રીફ્રેશર કોર્સ કરવા છતાં હજુ કમ્પ્યુટર જોઈએ તેટલું આવડતું નથી. એટલે જ તો તમને ફાઈલોનાં ઢગલાનો નિકાલ કરવાનું કામ સોપાય છે. અને તમારા હથોડાછાપ સ્વભાવને લીધે ઉઘરાણીના કામમાં તમને જ મોકલે છે. એ જોતા આ જે પગાર મળે છે તે તમારા બોસને તો વધારે જ લાગે છે. એટલે નોકરી છોડવાનું વિચારવામાં કશું ખોટું નથી, પણ બીજી મળે ત્યાં સુધી આ છોડવું ડહાપણ ભર્યું નહિ લેખાય હો.

તો આ વરસે તમે ફ્લૅટ તો ચોક્કસ બદલી કાઢો. તમારો બહેરો પડોશી ફૂલ વોલ્યુમ પર ટીવી મૂકે છે તે કઈ રીતે ચલાવી લેવાય? અને બારણું ખુલ્લું હોય તો ડોકિયા કરવાની કુટેવ તો (તમારા સહિત) લગભગ બધાને છે. દૂધવાળો મોડો આવે છે અને છાપાવાળો વહેલો, એમાં પેલા હર્ષદીયો તમારું છાપું તમારા કરતાં પણ પહેલા વાંચી નાખે છે. કચરા લેવાવાળો કાયમ તમે દાઢી કરતાં હોવ અને તમારી પત્ની ન્હાવા ગઈ હોય ત્યારે જ આવે છે. ચૌદ નબરવાળા સાત જણ ભેગા થઇ ચૌદ જણનું પાણી વાપરી નાખે છે. એમાં વોચમેનને બુમો પાડી પાણી ચાલુ કરવા કહેવું પડે છે. અને રોજ મોડું થઇ જાય છે. પાછો આ ફ્લેટ છે જુનો અને લીફ્ટ વગરનો છે એટલે વેચવા જતા મોકાની જગ્યાએ છે એમ છતાં રૂપિયા ઓછા ઉપજે એમ છે. અને નવો ફ્લેટ લેવા સાઈઠ લાખનું બજેટ થાય તે ક્યાં તમને પોસાય એવું છે?

અને છેલ્લે બદલવા જેવી છે પલ્લુ ઉર્ફે પલ્લવીને. એની સાથે મેસેજની આપ-લે અને બોસ બહાર ગયા હોય ત્યારે ઓફિસનાં ફોન ઉપરથી ચાલુ ઓફિસે વાત કરવી તો તમને ઘણી જ ગમે છે. એને તમારો એન્ગ્રી મિડલએજ-મેન સ્વભાવ અને અમિતાભ જેવો ઘેરો અવાજ ગમે છે, અને તમને એની શોલેની બસંતી છાપ બકબક. ફોન તમે કર્યો હોય ને ફોન પતે એ પછી તમને યાદ આવે કે મુદ્દાની વાત તો કરવાની રહી જ ગઈ. પણ પલ્લુ અવાર નવાર છૂટાછેડા લઇ લેવા દબાણ કરે છે એ તકલીફ છે. પણ સારું થયુ પલ્લુ યાદ આવી ગઈ. નોકરી બદલાશે તો પછી રોજ જતાં આવતાં પલ્લુને મળવાનું ક્યાંથી થઇ શકશે?

પણ ખુબ લાંબો વિચાર કર્યા પછી તમને એવું લાગવા માંડ્યું છે કે બદલવા જેવું તો આ બનિયાન છે. જેમાં તમે બાંય સમજી હાથ નાખવા જાવ છો તે બાંયને બદલે બાકોરું નીકળે એટલા તો મોટા કાણા પડી ગયા છે. એની લંબાઈનું માપ દરજી લે તો ચારે બાજુએથી જુદું નીકળે છે. પણ યાર, આમ જો તમે ઢીલા પડશો તો ગંજી સિવાય કશું બદલી નહિ શકો. તમારી પોતાની બુરાઈઓ અને મજબુરીઓ જોયા કરશો તો જીંદગીમાં તમે કશું નહિ કરી શકો. યાર, પ્રાણને પ્રકૃતિ સાથે જાય એ નાતે આપણે ન બદલાઈ શકીએ તો શું થયું, આપણી આસપાસનું બધું બદલી કાઢવું જ જોઈએ! મન મક્કમ કરો. નવા વરસમાં કૈક નવું કરો.